ฯ นโม ตสฺส ภควโต อรหโต สมฺมาสมฺพุทฺธสฺสฯ
วินยปิฏเก
วินยาลงฺการ-ฏีกา (ปฐโม ภาโค)
คนฺถารมฺภกถา
มุตฺตหาราทินยคาถา
โย โลเก โลกโลโก วรตรปรโท ราชราชคฺคชญฺโญ;
อากาสาการกาโร ปรมรติรโต เทวเทวนฺตวชฺโชฯ
สํสาราสารสาโร สุนรนมนโต มารหารนฺตรฏฺโฐ;
โลกาลงฺการกาโร อติสติคติมา ธีรวีรตฺตรมฺโมฯ
สีหนิวตฺตนนยคาถา
สํสารจกฺกวิทฺธํสํ, สมฺพุทฺธํ ตํ สุมานสํ;
สํนมามิ สุคุเณสํ, สํเทสิตสุทุทฺทสํฯ
อโนตตฺโตทกาวตฺตนยคาถา
เยน วิทฺธํสิตา ปาปา, เยน นิพฺพาปิตา ทรา;
เยน โลกา นิสฺสริสุํ, เยน จาหํ นมามิ ตํฯ
จตุทีปจกฺกวตฺตนนยคาถา
สงฺฆํ สสงฺฆํ นมามิ, วนฺตนฺตวรธมฺมชํ;
มคฺคคฺคมนผลฏฺฐํ, สุสํสํ สุภมานสํฯ
อพฺยเปตจตุปาทอาทิยมกคาถา
วินยํ วินยํ สารํ, สงฺคหํ สงฺคหํ กรํ;
จริยํ จริยํ วนฺเท, ปรมํ ปรมํ สุตํฯ
พฺยเปตจตุปาทอาทิอนฺตยมกคาถา
ปกาเร พหุปกาเร, สาคเร คุณสาคเร;
ครโว มม ครโว, วนฺทามิ อภิวนฺทามิฯ
วตฺถุตฺตเย คนฺถกาเร, ครูสุ สาทรํ มยา;
กเตน นมกฺกาเรน, หิตฺวา สพฺเพ อุปทฺทเวฯ
สิกฺขากาเมหิ ธีเรหิ, ชินสาสนการิภิ;
ภิกฺขูหิ วินยญฺญูหิ, สาทรํ อภิยาจิโตฯ
วณฺณยิสฺสามิ วินย-สงฺคหํ ปีติวฑฺฒนํ;
ภิกฺขูนํ เวนยิกานํ, ยถาสตฺติพลํ อหํฯ
โปราเณหิ กตา ฏีกา, กิญฺจาปิ อตฺถิ สา ปน;
อติสงฺเขปภาเวน, น สาเธติ ยถิจฺฉิตํฯ
ตสฺมา หิ นานาสตฺเถหิ, สารมาทาย สาธุกํ;
นาติสงฺเขปวิตฺถารํ, กริสฺสํ อตฺถวณฺณนํฯ
วินยาลงฺการํ นาม, เปสลานํ ปโมทนํ;
อิมํ ปกรณํ สพฺเพ, สมฺมา ธาเรนฺตุ สาธโวติฯ
คนฺถารมฺภกถาวณฺณนา